منتدى احدث الكتب الطبيه والبرامج

Forum latest medical books and programs


    مستقبـــــــل الطبيب السفــــــــــر للعمل بالخارج

    شاطر
    avatar
    d-forum
    مشرف عام المنتدى

    عدد المساهمات : 1204
    تاريخ التسجيل : 28/10/2009
    العمر : 43

    مستقبـــــــل الطبيب السفــــــــــر للعمل بالخارج

    مُساهمة من طرف d-forum في 05/11/09, 06:08 pm


    معظم زمايلنا الاطباء والطبيبات بيسافروا السعودية علشان كده انا هاتكلم باستفاضة عن السفر للسعودية


    الفرق بين العمل في القطاع الخاص والقطاع الحكومي ( وزارة الصحة السعودية )


    أولا : من ناحية الراتب



    الخاص في الغالب بيكون فلوسه أقل من الحكومة


    يعني الخاص تلاقيه ب 4 الالاف ريال أو نادرا 5000 ريال مع واحد واخد سنتين خبرة ورايح يشتغل جي بي أو طبيب مقيم


    لكن الشغل في وزارة الصحة السعودي كممارس عام أو طبيب مقيم بيكون كالآتي 4000 ريال أساسي المرتب + 400 ريال عن كل سنة خبرة بحد أقصي 15 سنة + 400 ريال بدل انتقال + 440 ريال بدل غلاء معيشة + تلات شهور بدل سكن + نص شهر بدل تأثيث يوخذ مرة واحدة بس خلال مدة التعاقد + زيادة 5 % سنوية


    ثانيا : من ناحية الأجازات


    الخاص بيديك 30 يوم إجازة في السنة 15 يوم منهم بس مدفوعي الأجر لكن العاام


    بيديك 45 يوم مدفعي الأجر يعني مرتبك شغال وأنت في الإجازة


    ثالثا : من ناحية السكن


    الخاص في الغالب بيوفرلك سكن ممكن يكون كويس وممكن يكون وحش


    لكن العام


    بيديك تلات شهور بدل سكن كل سكن يعني انت لو معاك سنتين خبرة ورايح السعودية تشتغل طبيب مقيم


    أو جي بي هاتاخد يا سيدي


    13200 ريال


    وتسكن انت بئه علي مزاجك في المكان اللي يريحك


    رابعا : من ناحية بدل التأثيث


    الخاص مش بيديك بدل تأثيث


    لكن العام


    بيديك نص شهر بدل تأثيث يعني لو معاك سنتين خبرة يديك


    2200 ريال


    والبدل ده لمرة واحدة بس أثناء مدة تعاقدك
    خامسا : من ناحية بدل الانتقال

    الخاص ممكن يوفرلك وسيلة مواصلات باص أو أي وسيلة تانية


    لكن العام


    بيديك 400 ريال شهريا كبدل انتقال


    سادسا : من ناحية بدل غلاء المعيشة


    الخاص لا يعطي بدل غلاء معيشة


    لكن العام


    يعطي 10 في الميه من أساسي راتبك كبدل غلاء معيشة عبارة عن


    440 ريال


    بس فيه الحاجة البدل السنة اللي جايه هايكون 15 في الميه ومش عارفين مصيره بعد كده
    سابعا : من ناحية الامتحان

    الخاص لازم تشترك في الهيئة السعودية للتخصصات الطبية ولازم تعملك امتحان علشان تمارس الطب في السعودية وبصراحة امتحاناتها


    وحشة أوي وصعبة


    وبتدفع فلوس يمكن بتاع 1000 ريال رسوم اشتراك عندهم


    لكن العام
    مافيش امتحان فيه إلا امتحان صوري كده مالوش لازمة اسمه امتحان تجديد العقد

    ثامنا : من ناحية طبيعة الشغل


    الخاص شغله متعب أوي لأنه بيديك فلوس ومستني النتيجة من وراك


    العام شغله أريح بكتير


    تاسعا : من ناحية المسئولية


    في الخاص بتكون المسئولية أكبر برايفيت بئه


    لكن العام انت محمي ونفس القوانين اللي بتحكم الموظف السعودي إلي حد ما مطبقة عليك دا غير انه العيان في القطاع الحكومي محتاجلك


    علشان الأجازات وحجات كتير


    عاشرا : من ناحية المعاملة


    الخاص لو انت وقعت مع صاحب مستوصف وحش أوعدك انك هاتكره حياتك وهاتروح علي طول دا لو عرفت تروح بلدك


    لكن العام مافيش كفيل


    كفيلك وزارة الصحة السعودية وماحدش ليه دعوة حر نفسك يعني

    وهل كل الخاص سىء؟؟

    لا طبعا مش كل الخاص وحش


    فيه خاص جميل أوي زي السعودي الألماني ومستشفي الحمادي وغيرها كتير وفيه برده مستوصفات خاصة مشهورة وكويسة


    بس الخاص مش مضمون لو هاتطلع خاص يبقي اطلع علي حاجة مشهورة ومعروفة احسنلك


    وكام تقريبا مصاريف فرد واحد فى الشهر؟؟


    النقطة دي بتختلف من واحد للتاني ومن واحد مجوز ومعاه أسرة ومن واحد عايش لوحده زي حلاتي


    نصيحة لو طلعت برايفت ما تطلعشي غير علي حاجة مشهورة وتسأل كويس أوي أبل ما تسافر علي المكان ده اسال عن كل حاجة فيه بدل سكن ولا هايوفرلك سكن طيب اجازتك كام يوم مين اللي هايدفع فلوس التذاكر عدد ساعات العمل فيه بدلات ولا مفيش فيه أوفر تايم ولا مفيش هاتروح المكان اللي هاتمضي عليه في العقد ولا هاتتوزع في مكان تاني غيره الراتب اللي هاتاخده هو نفس الراتب اللي مضيت عليه في العقد ولا هايقل لما تيجي السعودية يعني اسال علي كل حاجة ولو ليك واحد صاحبك ولا قريبك في السعودية خليه يسألك عن سمعة المستشفي او المستوصف اللي هاتروحه
    إجـــــــــــراءات السفر


    إلي كل طبيب أو طبيبة

    مهتم بالسفر


    إلي كل طبيب أو طبيبة


    ممكن يفكر في السفر في يوم من الأيام


    إلي كل طبيب أو طبيبة


    يعرفوا حد بيفكر في السفر


    يبقي لازم تقروا الموضوع ده


    وممكن تعملوا له كوبي وباست


    وتحتفظوا بيه عندكم


    للزمن


    هاتكلم إن شاء الله عن


    الإجراءات وتجهيز الأوراق الخاصة بالسفر


    لأنه الموضوع ده مهم ومتعب وشاق


    والطبيب اللي بيسافر بيقع في مشاكل وأخطاء كتير لما يجي يجهز نفسه للسفر


    وبيكون مش عارف يبدأ منين وينتهي فين


    وممكن يتكلف كتير نتيجة عدم معرفته الإجراءات


    علشان كده أنا جهزت الموضوع ده وربنا يعلم التعب اللي تعبته علشان


    أجهز الموضوع ده


    بس مش خسارة فيكم


    انتم تستاهلوا كل خير


    يا صفوة المجتمع


    ولا تنسونا بصالح الدعاء





    هأتكلم دلوقتي عن الإجراءات والورق المطلوب للسفر إلي السعودية وفي الغالب هو نفس الورق ونفس الإجراءات بتاع السفر

    أي دول من دول الخليج مع اختلاف الأماكن :


    الأوراق المطلوبة


    أولا : جواز سفر
    ثانيا : شهادة الخبرة .


    ثالثا : شهادة البكالوريوس شهادة مؤقتة أو الشهادة الكرتون


    رابعا : شهادة الخلو من الفيروسات الكبدية .


    خامسا : كشف طبي من المستشفيات المعتمدة .


    سادسا : شهادة تحركات


    سابعا : توثيق العقد


    ثامنا : إجازة بدون مرتب


    تاسعا : تصريح العمل


    عاشرا : إذن السفر


    وأخيرا : أمر الاركاب



    كيفية إعداد الورق


    أولا : جواز السفر


    تروح مصلحة الجوازات في المحافطة أو المدينة اللي


    أنت تابع ليها وتاخد معاك :

    1- كام صورة شخصية ولازم تكون خلفية الصورة بيضا بس أوقات يقؤلوا أي خلفية بس تكون سادة .


    2- البطاقة الشخصية ولازم يكون في البطاقة الشخصية بتاعتك مكتوب فيها طبيب بشري لو مكتوب طالب ولا طبيب امتياز


    يبقي لازم تغير البطاقة


    وتخليها طبيب بشري أو أوقات الجوازات بتوافق علي طالب او طبيب امتياز بس بشرط انك تجيب شهادة من مقر عملك ا


    نك بتشتغل طبيب بشري


    وكله حسب الظابط اللي موجود .


    3- و تجيب معاك من البوستة نموذج جواز سفر المفروض انه موجود في الجوازات بس أوقات كتير ما يكونشي موجود فأنت هاته من البوستة أفضل .


    4- وتاخد معاك شهادة الجيش سؤاء التأجيل أو الإعفاء أو شهادة إنهاء الخدمة العسكرية لو الشهادة دي في المديرية اعمل منها صورة طبق الأصل


    ولازم الختم يكون واضح فيها جدا .


    ودلوقتي قدامك حاجة من اتنين


    لطلع الجواز مستعجل ب 79 جنيه وده بيطلع في نفس اليوم بعد الضهر


    لطلع الجواز عادي ب 66 جنيه وبيطلع بعد يومين أو تلات أيام بالكتير



    ثانيا : شهادة الخبرة


    تروح علي مديرية الصحة اللي أنت تابع ليها أو ساعات الإدارة الصحية اللي أنت تابع ليها بطلع شهادة الخبرة برده .


    المهم تاخد بالك من الموظف وهوه بيكتب الشهادة لازم يكون فيها تاريخ التخرج وبداية الامتياز ومكانه ونهايته بعد كده تخليه يكتب تاريخ التكليف مش


    تاريخ استلام العمل لأنه تاريخ التكليف بيكون قبل تاريخ استلام العمل وده ممكن يفرق في سنوات الخبرة بعد كده ولازم يتكتب في الشهادة إذا كنت


    واخد إجازة بدون مرتب ابل كده ولا لا


    ولازم يتكتب الجهة الموجه ليها الشهادة يعني الدولة اللي أنت مسافر ليها


    الشهادة دي تمنها بيفرق من مديرية لاخري يعني يمكن 11 جنيه في المديرية


    وبعد كده تروح بالشهادة دي إلي المحافظة اللي أنت تابع ليها وتروح توثقها من المحافظة ب 5 جنيه من مكتب سكرتير عام المحافظة .


    بعد كده تطلع علي الخارجية المصرية وتروح توثق الشهادة هناك بختم الخارجية المصرية ب 10 جنيه توثيق الشهادة .


    وبعد كده تروح واخد الشهادة دي وتروح بيها السفارة السعودية بالقاهرة في شارع القصر العيني


    الجديد اليومين دول انه السفارة لم تعد تتعامل مع اشخاص من اجل توثيق الاوراق ولكن تتعامل مع مكاتب وسيطه


    يعني حضرتك بتروح فى اى وقت ترمى الورق الى عاوز توثقه للمكتب وتيجي بعد يوم او اتنين تاخده والورقه ب 80 جنيه يا ريس


    فيه مكاتب منتشرة حول السفاره ولكن افضلهم واسرعهم مكتب اسمهالمسافرنت


    ده موجود بعد السفاره


    تخلى السفاره على شمالك وتمشي لحد اما السفاره تخلص ومنطقه عمارات كده هو دور ارضي على يمينك


    ولو توهت اسال عليه وهناك هاتلاقي ناس توضلك لحد المكتب وبتاخد جنيه او اتنين



    ثالثا : شهادة البكالوريوس


    تاخد الشهادة المؤقتة أو الكرتون وتطلع بيها علي أمانة الجامعة وتقؤلهم عاوز أوثق الشهادة دي هايوثقوهالك مجانا وهاتطلع


    بعد كده علي الخارجية المصرية توثقها ب 10 جنيه .


    وبعد كده تطلع علي المحلق الثقافي السعودي في الدقي علشان توثق الشهادة منه مجانا برده وتكون واخد معاك عقد العمل وتصوره كام صورة


    وصور الشهاد


    ة كام صورة وصور البطاقة بتاعتك هايقؤلك تعالي بعد الساعة 3 النهاردة أو تعالي بكره استلمها .



    رابعا : شهادة الخلو من الفيروسات الكبدية


    من المعامل المركزية جنب وزارة الصحة


    تاخد الجواز بتاعك وكام صورة بس بشرط تكون الصور نفس الصورة اللي في الجواز بتاعك وتروح بدري يعني أخرك هناك 7 ونص الصبح


    وهاتدفع هناك بتاع 120 جنيه تمن التحاليل وهاتقف طابور ظريف بس بيخلص بسرعة ويتاخد منك عينة وفيه جدول استلام النتيجة


    يعني اللي يروح السبت يستلم النتيجة التلات اللي يروح الأحد يستلم النتيجة الأربع واللي يروح الاثنين يستلم النتيجة الخميس وهكذا


    وهايدوك إيصال وفي الإيصال ده فيه رقم ممكن تعرف نتيجة التحليل بتاعتك من النت وهاتلاقي الموقع بتاع المعامل المركزية في الإيصال


    وعلي فكرة مش بيكونوا كاتبين اذا كنت ايجابي أو سلبي في النتيجة اللي هايدوهالك بس لو كنت ايجابي هاتلاقي علامة علي جواب النتيجة بتاعتك


    والموظف اللي هايسلمك النتيجة هايقؤلك انك ايجابي بس نصيحة ما تروحشي تعمل تحليل الفيروسات ده غير لما تكون محلل في أي معمل كويس


    بره لأنه لو طلعت ايجابي هاتتسجل عندهم وهايبعتوا للسفارة السعودية ويستحيل هاتسافر بعد كده .



    خامسا شهادة الكشف الطبي


    طيب انت خلاص خرجت من المعامل المركزية وخدوا منك العينة وقالوا ليك تعالي بعد تلات أيام استلم النتيجة أول ما تخرج من باب المعامل المركزية


    هاتلاقي سوائقين تاكسي بيقولوا جامكا جامكا دي الشركة اللي هاتديك الجواب اللي هاتروح بيه علي المستشفي علشان تعمل الكشف الطبي وهاتلاقي بتوع التكاسي


    بيحملوا بالأربع أشخاص أو خمسة وبياخدوا من كل واحد 2 جنيه أو 3جنيه بالكتير المهم هايوصلك شركة جامكا لما هاتروح هناك هاياخدوا منك الجواز بتاعك


    وهاتلاقي فيه بتاع 8 مستشفيات ممكن تروحها اذكر منها القاهرة التخصصي النيل بداروي المهم اختار المستشفي الأقرب ليك من مكان سكنك وقؤل للراجل


    أنا عاوز مستشفي كذا بعد شويه هاينادوا علي أسماء الناس وهايسلموك الجواز وكمان ورقة موجهة للمستشفي اللي انت رايح ليها بعد كده تخرج من الشركة


    وهاتلاقي سوائقين تاكسي بيروحوا كل المستشفيات وبيحملوا خمسة أفراد أو أربعة وكل واحد بيدفع بتاع 5 جنيه أو 7 جنيه


    تروح المستشفي وتكون واخد معاك كذا صورة وتكون مجهز بتاع 180 جنيه


    وهاتروح تدخل ياخدوا منك عينة دم والمفروض عينة بول وبراز بس انت عرف نفسك انك دكتور ابل ما تدخل أي عيادة للكشف الطبي وابل ما تدخل المعمل


    علشان يتساهلوا معاك ومايخدوش عينة بول ولا براز وكمان علشان ماحدش يكشف عليك وبرده علشان أوقات بيروحوا مسقطين الناس في تحليل وظائف الكبد


    أو أي حاجة تانية علشان تعيد التحاليل عندهم تاني وياخدوا 300 جنيه تاني فا انت من أولها كده عرف نفسك انك دكتور .


    وعلي فكرة اللي بيعمل الكشف الطبي اطباء امتياز أو اطباء تكليف


    وهاتروح برده تعمل أشعة علي الصدر وهاتدخل عيادة الباطنة وهايسالك عندك الضغط أو السكر وهاتدخل عيادة الرمد .


    بعد كده هايقؤولوك تعالي بكره الساعة 3 خد النتيجة هاتروح وتستلم النتيجة تاني يوم لو فيه حاجة في التحاليل بتاعتهم أو أي حاجة هايقؤولوا ليك .



    سادسا شهادة التحركات من الجوازات


    شوف يا سيدي هاتروح مصلحة الجوازات اللي انت تابع ليها وتقؤلهم عاوز اطلع شهادة تحركات تكون واخد معاك ورقة وقلم وتكتب طلب لمدير الجوازات


    وتقف طابور وتدفع 13 جنيه وهايقؤلك تعالي بعد شهر خد الشهادة


    لو عاوز تختصر الوقت وتطلعها في 15 يوم روح مصلحة الجوازات اللي موجودة في مجمع التحرير بالقاهرة بالدور الأرضي علي ايدك اليمين وتكون واخد


    ورقة وقلم معاك علشان لو مش معاك ورقة وقلم هاتطر تشتري ورقة من راجل واقف بره المجمع الورقة مكتوبة جاهزة عندي بخط الأيد هو بس هايملي


    البيانات تصور هايقؤلك تلاتة جنيه يا أستاذ آل يعني انت ما تعرفشي تملا البيانات دي آه نسيت ولازم لازم تكون مصور الجواز بتاع كله علشان تصوير


    الصفحة الواحدة من الجواز ب جنيه في مجمع التحرير .


    هاتروح تقف الطابور وتسلم الطلب وهاتاخد إيصال تيجي بيه بعد 15 يوم علي الساعة 2 الضهر تستلم شهادة تحركات


    بس فيه ناس أصحابنا سافروا بدون هذه الشهادة .

    سابعا توثيق العقد

    تاخد عقد السفر وتروح توثقه من الخارجية لأنه فيه بعض المديريات بتطلب عقد موثق وأوقات بعض المديريات الغلسة بتطلب توثقه من السفارة فأنت


    وثقه من الخارجية ولو المديرية غلست وطلبت توثقه من السفارة خلاص وثقه هاتعمل إيه



    ثامنا إذن السفر


    تروح المنطقة العسكرية اللي انت تابع ليها وتاخد معاك الجواز بتاعك وتاخد معاك البطاقة وتاخد معاك شهادة الجيش بتاعتك ولو مش معاك خد معاك صورة


    طبق الأصل بس بشرط يكون الختم ظاهر هاتشتري شويه ورق ب 15 جنيه من عندهم وهاتصور كام ورقة كده وتملا شويه بيانات وتقدمهم وهايخلصوا


    ليك المصلحة في نفس اليوم أو تاني يوم وهايختموا انك مصرح لك بالسفر لو انت واخد إعفاء نهائي هايكون مكتوب علي الجواز بتاعك من الجوازات انك غير مطالب


    بتقديم إذن سفر للخارج ومش هاتحتاج تروح المنطقة العسكرية في هذه الحالة .



    تاسعا الإجازة بدون مرتب


    هاتخلي من مكان شغلك ومن المديرية وهاتروح لمدير الإدارة الصحية أو مدير المستشفي وتقدم له طلب إجازة بدون مرتب للعمل


    بالخارج هايرفعه لوكيل الوزارة


    وتاخد معاك العقد الأصلي فيه بعض المديريات بتطلب توثيقه من الخارجية فا الأحسن انك توثقه من الخارجية ب 10 جنيه وتريح نفسك .


    هاتروح لوكيل الوزارة هاتأشره من عنده بعد كده تطلع علي الأجازات علشان يطلعو ليك قرار إجازة بدون مرتب وهايقؤلوا ليك ادفع 50 جنيه تمن الإجازة


    دي بتاعة تجميل المدينة أو هات ال 50 جنيه واحنا هاندفعها مكانك


    طبعا دي سرقة فا أحسن انك تروح تدفعها في الخزنة بنفسك أو ممكن تتطنش وما تدفعشي وتقؤلهم مش عامل حسابي ومش جايب فلوس معايا .


    المهم طلعوا ليك قرار الإجازة روح بئه علشان تطلع تصريح العمل



    عاشرا : تصريح العمل


    تروح مكتب العمل في المحافظة اللي تابع ليها هايديك نموذج تروح تملاه من المستشفي وترجع بيه لمكتب العمل تاني وتكون واخد معاك العقد هاتقؤلي


    طيب ما العقد في المديرية خدوه واحتفظوا بيه لما روحت طلعت الإجازة بدون مرتب هأقؤلك ممكن تقدم ليهم صورة العقد مش شرط العقد نفسه ولو ما وافقوش


    علي صورة العقد ادخل للظابط الموجود في مكتب العمل وفهمه علي الموضوع ها يأشر لك علي الورقة بعدها تدفع في الخزنة بتاعة مكتب العمل 126 جنيه


    رسوم وتكون مصور الجواز بتاعك و أوقات يجبروك انك تصور عندهم وتكون واخد معاك كام صورة شخصية .


    هايقؤلولك تعالي بكره خد التصريح


    هاتروح تاني يوم لو مش عليك أي قضية أو حكم أو ليك أي نشاط سياسي هايطلعوا ليك التصريح لو فيه أي حاجة من دول خصوصا النشاط السياسي هايقؤولك


    روح أمن الدولة اللي في بلدك احنا بلغناهم عنك في الحالة دي تروح أمن الدولة برجيلك تتفاهم معاهم وتشوف المشكلة فين وتحلها


    ولو أي قضية ولا حكم تروح مديرية الأمن اللي انت تابع ليها وتحل المشكلة هناك .


    وبكده تكون خلصت كل الأوراق المطلوبة حطها بئه في مظروف كبير واطلع علي المكتب اللي مسفرك وراجع معاه كل الورق وسلمه الملف علشان يجبلك التأشيرة


    والمفروض انك بتدفع تمن التأشيرة اللي هو 80 جنيه


    بعد ما تطلع التأشيرة يبقي فاضل حاجة واحدة بس



    اخيرااااااااااااااااا أمر الاركاب


    بعد ما تطلع التأشيرة المكتب هايديك أمر اركاب تروح الخطوط الجوية السعودية في وسط البلد وتكون واخد معاك الجواز وتاخد 400 جنيه


    تدفعهم للخطوط السعودية كضرايب تذكرة .


    بس فيه حاجة أوقات المكتب اللي انت مسافر من خلاله هو اللي يجبلك التذكرة لحد عندك من غير ما تروح الخطوط الجوية السعودية .


    بعدها تسااااااااااااااااافر


    ألف مبرووووووووووووووووووووك



    واوعي تنساااااااااااااااااااااااني من دعاااائك خصوصا لما تعمل عمرة



    ملحوظة هاااااااااااامة


    كل أسعار الأوراق اللي أنا قؤلتها دي كانت عام 2007 الله أعلم دقولتي بقيت بكام .


    برده أوقات المكاتب بياخدوا فلوس ويخلصوا ليك بعض الورق





    ملحوظة مهمة جدا جدا

    أنا رفعت ليكم علي المرفقات قانون التوظيف السعودي للمتعاقدين بس فيه حاجة مهمة سلم رواتب الاخصايين والاستشاريين اتغيرت وبقي رابت الاخصائي كالآتي :
    8000 ريال أساسي
    400 ريال عن كل سنة خبرة بحد أقصي 15 سنة
    400 ريال بدل انتقال
    تلات شهور بدل سكن
    نص شهر بدل تأثيث
    10 % بدل غلاء معيشة
    5 % زيادة
    وكمان رفعت علي المرفقات نظام مزاولة الطب في السعودية علشان تعرف ايه اللي ليك وايه اللي عليك وما تقعشي في أي مشكلة





    هاكلمكم دلوقتي علي بعض المناطق في السعودية عن الموقع الجغرافي , المناخ , تعامل السعوديين اللي في كل منطقة

    مع المصريين , مستوي المعيشة والسكن


    بريدة

    ** الموقع الجغرافي : هي عاصمة القصيم والقصيم منطقة كبيرة تقع شمال الرياض ب 345 كيلو وبريدة عبارة عن مدينة كبيرة جدا وفيها كل حاجة وفيها



    مستشفيات كبيرة


    زي مستشفيات الحرس ومستشفي الملك فهد


    ** المناخ : مش بيختلف كتير عن الرياض يعني حر بس صاحبي السعودي اللي منها وبيشتغل معايا في نفس المكان بيقؤل انه جوها أحسن من الرياض شويه


    ** تعامل الناس: بريدة ناس متدينين شويه أكتر من بتوع الرياض
    ** مستوي السكن والمعيشة : أقل من الرياض يعني السكن أرخص كمان مستوي المعيشة أقل زي مثلا العيشة في القاهرة غير المعيشة في أي محافظة تانية والرياض

    هيا العاصمة علشان كده غالية والسكن بيوصل 30 ألف ريال في السنة .


    حائل


    ** موقعها الجغرافي

    : شمال القصيم علي بعد 300 كيلو من القصيم و 400 كيلو من المدينة المنورة وهيا عبارة عن منطقة كبيرة تحتوي

    علي الكثير من المدن والقري .


    **المناخ : جوها أخف من الرياض بكتير يعني فيه هوا ومفيش نار جهنم اللي احنا فيها دي في الرياض بس بيقؤولوا في الشتا برد اوي وممكن تلاقي تلج


    **تعامل الناس : معروف هنا في المملكة انه ناس حائل مشهورين بالكرم وبيقؤولوا انهم ناس كويسين وتعاملهم كويس


    **مستوي المعيشة والسكن : مايختلفشي كتير عن بريدة بس طبعا زي ما قؤلنا أرخص من الرياض


    تبوك


    اللي أعرفه انها شمال المملكة خالص فوق فوق خالص وجوها


    حلو بس في الشتا تلج تلج وعبارة عن منطقة كبيرة برده

    تعامل الناس وطبيعة البلد لسه ما عرفتهاش هابقي اعرفها واقؤلكم .


    الرياض


    **الموقع الجغرافي

    :تقع الرياض في المنطقة الوسطي ويوجد بها العديد من المحافظات زي الخرج والقويعية والدوادمي ومحافظات كتير تانية

    **المناخ : حررررررررررررررررر حررررررررررررررر حررررررررررررررررررر وفي الشتا بررررد


    **طبيعة الناس وتعاملهم : جافيين وصعبين شويه بس مع الوقت هاتتعرف تتعامل معاهم وهاتفهمهم


    **مستوي المعيشة والسكن غالي في الرياض نفسها لكن بقية المحافظات اللي تبعها مش غالية اوي لكن الرياض العاصمة السكن في اي حد كويس


    ممكن يوصل 30 الف ريال بس فيه مناطق تانية ممكن ب 10 الالاف أو 15 ألف زي البطحاء والمنفوحة بس المناطق طبعا مش زي الاحياء الفخمة التانية الموجودة في الرياض والمنفوحة دي مستعمرة مصرية علي ارض الرياض معظمها مصريين


    علي فكرة حكاية المناخ دي ما تعملكيش أي قلق لانه في الشغل فيه مكيف والشقة مكيف وفي العربية مكيف وأي مكان هاتروحه هاتلاقي فهي مكيف


    وحكاية التعامل مع المصريين في كل منطقة فاأحب أقؤل انه في كل مكان فيه العالم فيه اللي كويس وفيه الوحش بس أوقات مناطق يغلب فيها الوحش

    علي الكويس بس هاتلاقي فيها نسبة برده كويسين





    سؤال وجواب


    السؤال الأول
    بالنسبة للامتحان بتاع الهيئة السعودية للتخصصات الطبية ده بيبقى في مصر ولا في السعودية؟؟

    وده لازم في كل الشغل الخاص؟؟


    ولو سقطت مثلا مش هسافر ويضيع عليا 1000 ريال

    الاجابة

    أول حاجة الامتحان مممكن تمتحنه في مصر أبل ما تسافر وممكن تمتحنه في السعودية .


    تاني حاجة أيوه الامتحان ده اجباري مادام هاتسافر تشتغل في الخاص .


    تالت حاجة لو سقطت هايتعاد ليك الامتحان وهاتعمل حاجة اسمها ترخيص مؤقت تلات شهور وكده يعني لحد ما عقدك ينتهي


    وخلاص بس ماسمعناش انه فيه


    حد رجع من السعودية علشان الامتحان ده بس بيقؤولوا انه امتحان مش سهل

    السؤال الثاني

    بالنسبة للسفر في الامارات ايه شروطه وازاي أسافر علشان اشتغل هناك ؟؟ وايه الفرق بين السعودية والامارات في الشغل والتوفير ؟؟


    الاجابة



    الجزء الأول : علشان تسافر الامارات يبقي لازم تعدي امتحان اسمه DOH or MOH واوقات تسافر من غي رما تمتحن هنا في مصر بس تمتحن هناك في الامارات لما تروح
    الجزء الثاني :

    اولا : مستوي المعيشة في الامارات غالي جدا جدا يعني اضعاف اضعاف السعودية


    ثانيا:السكن في الامارات معدي فوق فوق خالص لكن السعودية ممكن تسكن حسب امكانايتك


    ثالثا السفر للامارات مش سهل ومش كتير يعني الفرص قليلة وتكاد تكون نادرة لانه اللي بيروح هناك بيرتاح نفسيا


    وفي الغالب مش بيرجع علشان كده الاماكن


    اللي متوفرة هناك للشغل قليلة


    رابعا ميزة الامارات الفظيعة انها الناس هناك كويسة الشعب نفسه كويس وبيعامل اي واحد غريب عن البلد بطريقة كويسة اوي


    خامسا 99 % من الاماكن في الامارات راقية ومناطق كويسةة عكس السعودية فيه أماكن كتير بدو ولسه بدائية صحرا وجبال .


    السؤال الثالث

    دلوقتي معظمنا في التكليف يعتي لسه مخلصناش السنتين الخبره لو الواحد فكر يطلع جي بي ايه الطريق اللي المفروض


    يمشيه وايه اللي ممكن يعلي السي في


    بتاعك علشان لو طلعت اطلع علي مستشفي حكومي ؟؟


    ولو الواحد انتظر سنه وبقي معاه سنه خيره كنايب

    في تخصص حتفرق كتير ولا مش فارقه ؟؟

    الاجابة


    الطريق


    انك علشان تسافر يبقي تعمل الاتي :

    أولا : لازم تخلص سنتين خبرة لو هاتشتغل حكومة أما لو هاتشتغل خاص فا اوقات ما يكونشي شرط أوي سنتين ممكن


    سنة بس طبعا انا اتكلمت عن مساؤي


    الخاص ممكن تشوف المقارنة اللي عملتها بين الخاص والعام


    ثانيا : بعد ما تخلص السنتين تروح تقدم ال سي في بتاعك لتلات اماكن لو عاوز تسافر السعودية اللي هياأكتر دولة دلوقتي متاحة للسفر والأسهل


    أول مكان : مكتب التوظيف السعودي


    تاني مكان : شركة مصر الحجاز


    تالت مكان : شركة بيونيرز


    دول أحسن تلات شركات في مصر تطلع دكاترة للشغل في السعودية و99 % العقد اللي بيجبوه ليك بيكون عقد حكومة


    وبياخدوا منك حسبة 5000 جنيه كعمولة


    ثالثا : بعد ما تقدم ال سي في تنتظر شهر اتنين تلاتة أو ممكن ما تنتظرشي أسبوع حسب اللجان اللي بتجي تمتحن الناس من السعودية


    بعدها بيتصلوا بيك علشان تيجي تعمل انتر فيو


    99 و9 من عشرة هاتتقبل علشان عمولة المكتب وعلشان اللجنة ما تروحشي ايديها فاضية


    اللجنة هاتسألك كام سؤال في الضغط السكر تسمم الحمل يعني حجات عامة


    كام حالة طوارئ رسم القلب يعني اسئلة سهلة


    بعدها بأسبوع أو أقل بيتصلوا بيك ويقؤلوا ليك انك نجحت ويلا جهز ورقك


    وخلال شهر تكون مساااااااااااااااااافر


    وايه اللي ممكن يعلي السي في بتاعك علشان لو طلعت اطلع علي مستشفي حكومي ؟؟؟


    شوف يا صديقي العزيز


    مفيش شئ اسمه يعلي ال سي في بتاعك


    أنا أعرف واحد صاحبي والله كتب ال سي في بخط ايده علي حتة ورقة فلسكاب وبعتها مع واحد صاحبه لمكتب التوظيف السعودي


    والدكتور زميلي مش معاه اي حاجة غير أنه اشتغل سنتين في وحدة صحية عادية جدا ومش معاه أي دورات


    مكتب التوظيف السعودي بعتله وعملت اللجنة معاه امتحان ونجح وسافر لا وايه طلع طبيب مقيم أسرة ومجمتع اللي هو الاسم الجديد هنا


    في السعودية للطبيب العام


    وصاحبي ده معايا دلوقتي في الرياض بيشتغل في مركز صحي حكومي


    واحد صاحبي تاني بيشتغل في وحدة صحية ومش معاه اي دورات معتمدة قدمت ال سي في بتاعه بنفسي في مكتب التوظيف السعودي


    راح مكتب التوظيف بعتله وعمل معاه انترفيو بسيطة ونجح والشهر ده هايجي مستشفي حكومة في الطائف وعارف هايجي ايه


    جاي علي طبيب مقيم باطنة مع أنه اساسا جي بي في وحدة صحية


    ولو الواحد انتظر سنه وبقي معاه سنه خيره كنايب في تخصص حتفرق كتير ولا مش فارقه ؟؟؟


    مش فارقة خالص


    لانه راتب الطبيب المقيم زي راتب ال جي بي


    مش بتفرق غير سنوات الخبرة


    يعني لو استنيت سنة زيادة هاتاخد 200 ريال زيادة فوق اي واحد طالع بسنتين بس كسنة خبرة زيادة


    اللي يفرق الاخصائي لانه الاساسي بتاعه أعلي


    وسنة الخبرة بمبلغ أكتر من 200 ريال


    بس علشان تطلع اخصائي يبقي لازم يكون معاك ماستر وسنتين خبرة بعد الماستر


    حتي الدبلومة بطلوا يعترفوا بيها كاخصائي

    السؤال الرابع

    انا قدامى فرصة سفر لليبيا على 1100 دينار مش عارف ايه النظام هناك لو حد يعرف يا ريت يفدنى


    والشغل 60 ساعه فى الاسبوع


    ولو استلمت النيابه ممكن اخد اجازه بدون مرتب ولا لاء مع العلم انه معايا سنة خبرة واحدة بس؟؟؟


    الاجابة



    أولا :


    طيب انا قدامى فرصة سفر لليبيا على 1100 دينار ؟؟؟


    /هاعملك مقارنة بين ليبيا والسعودية


    من ناحية المرتب


    هانفترض انه معاك سنتين خبرة لو هاتسافر السعودية


    ليبيا 1100 دينار يعني 5000 جنيه تقريبا ( سنة واحدة خبرة )


    لكن السعودية ( سنتين خبرة )


    5000 ريال يعني 7100 جنيه مصري


    من ناحية عدد ساعات العمل


    ليبيا 60 ساعة عمل أسبوعيا


    لكن السعودية


    48 اسبوعيا


    من ناحية المعاملة


    البلدين فيهم الكويس وفيهم الوحش بس نسبة الوحش الكويس الي الوحش كام دا انا ما اعرفوش
    وعلي فكرة ليبيا عاوزة اطباء أسرة ب 2000 دولار والمعهد القومي للتدريب عامل دورات طب اسرة علشان الدكاترة يسافروا بعدها للعمل بليبيا


    ثانيا :ولو استلمت النيابه ممكن اخد اجازه بدون مرتب ولا لاء؟


    [القانون بيقؤل انك تستلم النيابة ومن حقك تحتفظ بيها سنتين عن طريق انك تاخد اجازة بدون مرتب للعمل بالخارج سنتين


    لو ما رجعتش بعد سنتين النيابة هاتتلغي


    وهاتحرم من التقديم في


    النيابة حركتين متتااليتين

    السؤال الخامس

    هل سنة الامتياز تحتسب من سنوات الخبرة عند السفر للعمل بوزارة الصحة السعودية ؟؟


    الاجابة



    قانون التوظيف السعودي


    بينص علي انه سنة الامتياز لا تعتبر سنة خبرة


    يعني مش هاتنفع تسافر السعودية غير علي


    سنتين خبرة من بداية التكليف

    استفسار من زميل فاضل

    انا فاضلى اربع شهور واخلص امتياز


    فى الغالب هيبقى عندى جيش ( انشاء الله اخد اعفاء )


    وتقديرى جيد على 72 % بحب الاطفال جداوالانف والاذن ولكن عشان اتخصص فى الاطفال هنا محتاج بتاع 6 سنين ولا حاجة وعشان اتخصص انف واذن هقعد كتير اوى هنا فى مصر ده لو اتعلمت حاجة فى المكان اللى هتجيلى فيه نيابتى ففكرت اتخصص فى حاجة من التخصصات الملحة وعينى على الطوارىء او العناية


    انا بس طالب منك طلب واعتبرنى زى اخوك بجد عشان حبيتك فى الله نصيحة منك من اللى انا هكتهولك ده احسن خطة ليا ايه مع العلم انى عايز اسافر وموش عايز اقعد هنا كتير


    على فكرة انا ضفت ايميلك بعد اذنك وبجد احب اكون اخوك فى الله


    انا شاكر ليك جدا وجزاك الله خيرا


    الــــــــرد


    بسم الله الرحمن الرحيم


    أخي العزيز


    السلام عليكم ورحمة الله وبركاته


    أنا أتشرف تكون أخويا


    بالنسبة لنصيحتي في موضوعك ده


    بص يا باشا


    انت تمسك العصاية من النص وتحاول انك ما تخسرشي أي حاجة وفي نفس الوقت تحقق كل اللي نفسك فيه يعني تاخد النيابة وتسجل وتسافر هاتقؤلي هأقدر أحقق دا كله هأقؤلك اه


    ازاااااااااااااي بئه


    أولا بالنسبة للنيابة : اعتبر انك خلصت الامتياز وافترض الأسوء انك دخلت جيش تقدر أثناء خدمتك في الجيش تقدم علي نيابة طبعا أنا أقصد النيابات الملحة وأنا من رأيي انك تقدم في الملحة وما تنتظرشي بس الأول حدد انت عاوز ايه ميولك جراحية ولا باطنية لو جراحية خد طوارئ ولو باطنية خد رعاية وعلي فكرة تقدر تقدم برده علي نيابة جراحة قلب وصدر هاتقؤلي هو فيه تعليم في نيابة جراحة صدر وقلب هأقؤلك انك من خلال جراحة الصدر والقلب هاتحضر ماستر جراحة عامة زي أي حد بتاع جراحة ولما هاتتعين في مستشفي صحة طبعا مفيش شغل جراحة صدر وقلب وهاتشتغل شغل الجراحة يبقي بكده انت أخدت نيابة جراحة عامة بطريقة غير مباشرة دا لوحابب تتخصص جراحة عامة .


    ثانيا بالنسبة التسجيل : تقدر برده وانت في الجيش انك تقدم في حركة التسجيل وتسجل ماستر أو دبلومة زمايلنا سجلوا وهما في الجيش وبرده لو انت مش في الجيش برده هاتقدر تقدم نيابة وتسجل في أول حركة تسجيل تظهر


    ثالثا بالنسبة للسفر : مش هأتقدر تسافر غير بعد مرور سنتين بعد انتهاء الامتياز يعني لازم يكون ليك سنتين خبرة وده لوعاوز تشتغل في القطاع الحكومي أما الخاص فا ممكن سنة او سنة ونص لانه الحكومة بتشترط سنتين خبرة بعد الامتياز وأنا أفضل ليك انك تشتغل في القطاع الحكومي


    وعلي فكرة انتظارك سنتين بالنسبة لواحد زيك أفضل عارف ليه علشان تكون قدمت علي نيابتك واستلمتها وكمان سجلت ويمكن كمان تكون امتحنت الفيرست وممكن كمان تخطب أبل ما تسافر وتعال نحسبها سواء باليوم وبكل دقة


    الحل ( 1 )


    ان شاء الله انشاء الله هاتستلم التكليف في شهر 4/2009 اللي جاي بالكتير وهاتقدم ان شاء الله في حركة النيابات اللي تنزل في شهر 5 /2009وهاتكتب الرغبات الملحة اللي عينك عليها هاتظهر نتيجة النيابة في شهر أغسطس/2009 علي أسؤء الظروف لو انت في الجيش هاتقدر تستلمها وهاتسجل ماستر مثلا في شهر ابريل 2010 سواء كنت في الجيش او بره الجيش وهاتظهر نتيجة التسجيل في شهر أكتوبر 2010 وان شاء الله تتقبل وفي شهر 12/2010 تروح تقدم ال سي في بتاعك في مكتب التوظيف السعودي وفي شركة مصرالحجاز وفي شركة بايونيرز


    وان شاء الله في شهر 4/2011 تقدر تمتحن الفيرست بتاع الماستر طبعا كده انت كملت سنتين خبرة وفي الغالب هاتكون عملت انترفيو وتقدر تسافر بعد الفيرست وسكند الماستر بيكون في شهر 10 /2011 وممكن تأجله الي 10/2012 بحيث تكون سافرت سنة وتظبت اجازتك علي اساس تنزل تمتحن السكند طبعا هاتكون اشتغلت فترة في النيابة ابل ما تسافر وهاتعرف تجاوب في السكند وهاتذاكر وانت مسافر علشان تقدر تنزل تمتحن السكند في الاجازة السنوية بتاعتك


    المشكلة انك بعد ما تخلص السكند لازم تنزل علشان تحضر الرسالة لانها بتحتاج انك تلصق للمشرف بتاعك يبقي بكده انت سافرت سنة وكام شهر طيب تعمل ايه انت عاوز تسافر سنتين لانه سنة وكام شهر مش هاتكون لحقت تعمل


    فلوس كويسة لانه قانونيا لا يحق ليك السفر غير سنتين بس اثناء فترة النيابة


    الحل البديل ( 2 )


    ممكن تسجل دبلومة حديثة وتمتحن الجزء الأأول في شهر أبريل 2011 برده وتمتحن الجزء التاني في شهر أكتوبر 2011 برده وبكده تكون أخدت دبلومة وتقدر بعدها تسافر لمدة سنتين ولما ترجع ان شاء الله من بره تقدم طلب انك عاوز تحول دبلومتك الي ماستر عن طريق انك تحضر رسالة وتتحول الدبلومة الي ماستر دا قانون الدبلومة الجديدة


    الحل البديل (3 )


    انك ما تسجلشي خالص لحد ما تسافر واثناء السفر تقدم علي حركة التسجيل بحيث في اخر نزول ليك مصر تقدر تبدأ في امتحانات الماستر


    الحل البديل ( 4)


    انك ما تسافرشي غير بعد ما تاخد الماستر وده أفضل لواحد زيك لانه كده كده مش هاتقدر تسافر غير بعد مرور سنتين خبرة وان شاء الله خلال سنتين ونص تكون خلصت الماستر وبعدها تسافر براحتك وتكون ريحت دماغك من قصة الماستر وترجع مصر مرتاح


    أنا أفضل الحل رقم 2 أو الحل رقم 4


    لو مستعجل علي السفر اختار الحل رقم 2 لو مش مستعجل اختار الحل رقم 4


    لو هاتعرف توفق وتظبت أمورك صح اختار الحل رقم 1


    لو مش فارقة معاك الماستر دلوقتي اختار الحل رقم 3


    وربنا يوفقك واي تساؤلات أنا موجود


    ويا ريت ربنا يكون وفقني في الاجابة علي اسئلتك




    وطبعا جه في الاخر وفي الاول رؤية ومجرد رأي ليا وانت اختار اللي يريحك واللي يناسب



    أخي الطبيب ... أختي الطبيبة


    عاوز تسافر ليه؟؟؟؟



    هذا الموضوع مجرد رأي أو رؤية شخصية مني



    سؤال لازم تسأله لنفسك أبل ما تقرر انك تسافر


    تعال نشوف ايه الأسباب اللي ممكن تخليك تسافر

    1- عاوز تعمل فلوس بسرعة علشان تتجوز ولو قعدت في مصر هاتاخد فترة طويلة علشان تعمل الفلوس اللي هاتجوز بيها


    2- عاوز تشتري عربية نضيفة


    3- عاوز تعمل فلوس علشان تعرف تجهز عيادتك


    4- عاوز تعمل فلوس للزمن ( خميرة ) ماحدش ضامن بكره في ايه


    5- زهقت من مصر وقرفت من الشغل في مصر وزهقان من البلد وعاوز تخرج منها بأي طريقة



    6- عاوز تسافر بحيث تدخل فلوس كويسة تقدر تصرف علي أسرتك وفي نفس الوقت يكون عندك الوقت والفلوس علشان أحضر الزمالة الأجنبية كذا أو المعادلة كذا



    7- عاوز تحج أو تعمل عمرة وكمان تعمل زيارة لوالدك ووالداتك علشان يحجوا لأنه الحج مكلف خالص اليومين دول مش أقل من 30 الف جنيه للفرد



    دي كلها أهداف كويسة تقدر تسافر علشان تحقق بعض هذه الأهداف أو كلها


    رأيي كالاتي



    انك تسافر بس بشرط ترجع وماتقعدشي كتير جاست حققت هدفك اللي مسافر علشانه يبقي لازم ترجع لأنه الشغل بره مش مضمون ممكن في أي وقت ترجع بلدك وكل سنة بتعدي عليك وأنت في الغربة بتقلل من فرصة شغلك بعد كده في مصر



    فا أول حاجة ابل ما تقرر تسافر لازم


    تحدد هدفك


    ايه هدفك من السفر ؟؟؟


    ولما تحقق هدفك ارجع بسرعة وكمل حياتك في بلدك


    لما جينا هنا في السعودية لقينا دكاترة معانا هنا قعدوا يشتغلوا في السعودية 25 سنة وفي الآخر وزارة الصحة السعودية ما رضيتشي تجدد ليهم العقد ومش عارفين يعملوا ايه


    لو رجعوا مصر مش هايعرفوا يشتغلوا لأنه خلاص راحت عليهم


    ولو قعدوا في السعودية مفيش شغل خلاص وزارة الصحة استغنت عنهم


    يبقي الصح


    انك لازم ترجع وماتتغرش بالعيشة في السعودية لأنها مش مغرية أوي


    والحياة هنا مش حلوة أوي حتي بالنسبة الفلوس اللي هاتعملها مش زي زمان


    يعني اللي كان يتعمل في السعودية زمان في سنة دلوقتي علشان يتعمل عاوز سنتين


    لأنه الدنيا غليت أوي هنا أغلي من مصر طبعا بمراحل


    بس طبعا الدخل أعلي علشان كده هاتقدر برده تحقق معظم أهدافك


    وممكن في مصر تحقق أهدافك دي بس ممكن تاخد منك وقت أطول وبرده هاتفضل تشتغل ليل ونهار علشان تعرف تجيب الفلوس اللي ها تجيبها هنا


    وماتقؤلشي مصر بقيت وحشة والعيشة فيها مش حلوة لانك مش هاتعرف قيمة مصر غير لما تتغرب عنها هايوحشك بعد كده ريحة الهوا بتاع مصر وتراب مصر والشوارع والبيوت دا مش كلام شعارات بس هيا دي الحقيقة


    السعودية عاملة زي الوردة الصناعية حلوة بس مفيهاش أي روح


    طيب خلاص انت حددت هدفك ونويت انك ما ماتقعدشي كتير في السعودية


    يبقي لازم ما تخسرشي او علي الاقل تطلع بأقل الخساير


    بمعني لازم تاخد نيابة أبل ما تسافر


    طيب لو استملت النيابة يبقي مش هايكون ليك حق غير انك تقعد غير سنتين بس في السعودية لانه لو قعدت أكتر من كده النيابة بتاعتك هاتتلغي وهاتتحرم سنتين من التقديم للنيابة ولو مر عليك خمس سنين ماتاخد نيابة هاتفضل طبيب في القطاع الريف طول عمرك


    يبقي المفروض


    تاخد نيابتك


    وبالنسبة للتحضير الماستر او الدبلومة قدامك أكتر من طريق


    أما


    تسجل أبل ما تسافر وتذاكر وانت في الغربة وترجع تمتحن في الإجازة السنوية بتاعتك


    أو


    تسجل بعد ما ترجع يعني بعد سنتين وتحضر وأنت في مصر


    أو


    تسجل وتمتحن وتاخد الماستر أو الدبلومة أبل ما تسافر


    بالنسبة للناس اللي بيدخلوا في مشوار الزمالات ممكن ياخدوا نيابتهم ويسافروا وأثناء السفر ياخدوا الفيرست بتاع الزمالة ويرجعوا ياخدوا السكند وياخدوا الماستر




    يبقي كده أنت ما خسرتش حاجة عملت فلوس اللي هاتحقق بيها الهدف بتاعك

    وفي نفس الوقت مشوارك العلمي ما اتاخرتش فيه وزيك زي زمايلك اللي ما سافروش


    طيب فيه واحد ممكن يقؤل أنا هايكفيني أقعد سنتين بس في السعودية علشان أحقق أهدافي لانه عليا التزامات كتير

    هايكون ايه الحل ؟؟


    الحل هو


    طبعا انتو عارفين انه مش مسموح ليك غير بسنتين اجازة بدون مرتب للسفر اثناء فترة النيابة بمعني انك لو استلمت النيابة مش بيحق ليك تقعد غير سنتين بره مصر والا سوف تلغي لك النيابة


    الحل انك ما تقدمشي علي نيابة وتسافر بعد ما تكمل سنتين الخبرة المطلوبة وطبعا انتو عارفين انه مسموح تقدم نيابة لحد 5 سنين من استلامك التكليف ولو سافرت بعد سنتين يبقي فاضلك تلات سنين يعني تلات حركات نيابة المفروض لو انت عاوز تقعد فترة أطول في السعودية ما تقدمشي نيابة غير في السنة الخامسة من بداية التكليف وعادي ممكن تقدم وانت في السعودية أو حد يقدملك بس بشرط تنزل خلال ست شهور تستلم النيابة ولما تحفظها يبقي ليك الحق انك تحتفظ بيها سنتين يبقي انت كده قعدت في السعودية خمس سنين


    وفيه ناس تانية مش هاتقدر تتغرب وتسافر لأي ظروف


    أنا بقؤلهم عادي ممكن تحقق طموحاتك وأحلامك في مصر


    وممكن أكتر ممما تتمني كمان


    وهيا توفيق من عند ربنا و مسألة وقت بس


    لأنه الرزق واحد في أي مكان تروح في الدنيا


    وربنا يوفقك الجميع إلي ما يحبه ويرضاه




    كيف تحقق أكبر استفادة من السفر ؟؟
    اولا حدد هدفك
    لازم أبل ما تسافر تحدد الهدف اللي انت مسافر علشانه علشان الدنيا ما تاخدكشي وتنسي هدفك وتبص تلاقي نفسك ما عملتش حاجة
    ثانيا سياسة التوفير
    الهدف الرئيسي من السفر هو المادة يعني الفلوس علشان كده لازم تتعلم كويس سياسة التوفير لانك مش رايح تتفسح وتصرف فلوس
    لانه جنيه الغربة تمنه غالي اوي
    وانا مش بقؤل امسك علي نفسك لا بقؤل خليك في المعقول
    وطبعا بتختلف المصاريف من شخص للتاني اذا كان لوحده ولا كان معاه أسرة وبتختلف برده من مكان للتاني في السعودية
    ثالثا اسال
    أبل ما تعمل أي خطوة في أي حاجة زي الشراء مثلا اسال أي حد تعرفه بس يكون أمين علشان ممكن يضحك عليك في حجات كتير
    وأبل ما تستخرج أي ورقة اسال برده علشان الروتين هنا في السعودية موجود بصورة كبيرة خصوصا لو كانت الهيئة حكومية وفيها موظفين سعوديين كتير
    رابعا تعلم
    لو عندك وقت فراغ ممكن تستغله في مذاكرة زمالة مذاكرة مادة التخصص بتاعك مذاكرة ماستر دبلومة أو قراية أي حاجة طبية جديدة من علي النت المهم انك ما تسبشي نفسك كده من غير تعليم مستمر
    خامسا : طور نفسك
    حاول تستفيد من المواقف المختلفة اللي بتمر بيها كل يوم لانه ده هايزيدك خبرة في كيفية التعامل مع الناس سواء لما ترجع مصر أو لما تكون موجود هناك
    سادسا : حاول
    حاول ما تمسكشي أي شغل اداري او شغل فيه مسئولية كبيرة لانك مش في بلدك ويوم ما هاتوقع مش هاتلاقي حد جمبك حتي في شغلك الطبي خليك في الامان علي أد ما تقدر وخليك حريص
    سابعا : تأقلم
    في بداية وصولك السعودية ولشهور قليلة ممكن تحس انك قرفان ومدايق وممكن تفكر انك ترجع مصر تاني بس صدقني دي فترة مؤقتة وهاتعدي وهاتتأقلم علي الجو وعلي الناس وعلي كل حاجة
    ثامنا : البشر اصناف
    هنا في السعودية زي ما فيه الوحش فيه الكويس ومع الوقت هاتعرف تتعامل مع السعوديين وتعرف تاخد حقك منهم بالاحترام وبالادب بدون أي مشاكل لانه فيه اختلاف في الثقافات والعادات والتقاليد
    تاسعا : خليك في حالك
    الافضل في السعودية انك ما تعملشي علاقات كتير سؤاء مع سعوديين أو مصريين أو أي جنسية أخري لانه ناس كتير بتتغير في الغربة
    عاشرا تقرب الي الله
    الجو هنا في السعودية يساعد علي الالتزام ووجودك بجوار الاماكن المقدسة هايساعدك أكتر علي التقرب الي الله وطبعا لازم تحج ولازم تعمل عمرة واتنين وتلاتة وعشرة
    ==================================

    انتهي الجزء الثامن


    علي وعد بلقاء ان شاء الله في الجزء التاسع ( الزواج) من سلسلة



    مستقبل الطبيب
    نـــــــداء ورجاء
    إلي كل من قرأ هذا الموضوع
    لا تنسونا من الدعاء بظهر الغيب
    وجزاكم الله كل خير
    والسلام عليكم ورحمة الله وبركاته





    دكتور
    أحمد رفعت عدلي




      الوقت/التاريخ الآن هو 24/06/18, 08:51 am